Lys og struktur

Eg vinn nok ikkje prisen for ivrigaste bloggar i år, men eg får trøste meg med at eg i alle fall jobbar det eg skal, er mor slik eg skal, og er prosjektleiar for huset dei timane det tek. Nesten. For det å bygge hus, rettare sagt, å ha andre til å bygge hus for ein, er noko som krev sine timar. Her føl uansett nokre bilde og ei rask oppdatering.

Denne veka har muraren starta med puss inne. Det er neste som kunstverk syns eg, og eg blir beint fram glad av den fine strukturen vi får på veggane som er yttervegger. Kombinert av alt lyset i hovedetasjen så ser vi allereie at her er det kvalitetar som vi kjem til å like. Sjølv utan møblar og fargar av noko slag så er det slik nå at vi helst ikkje vil heim dit vi eigentleg bur for tida.

Vi vil heller vere i det uferdige, umøblerte huset med alt lyset. Og så er det masse sol her. Og god varme. Og det luktar godt av tømmer.

Men her er ikkje buande heilt enda. Innflytting vil bli i slutten av juni. Det som gjenstår er litt meir puss inne og puss ute. Tak og vegger skal malast. Golv summast. Dører skal i, og terrasse leggast. Bada står utan gips enn så lenge. Der skal komme boksar til dei innvendige armatura, og vi må ha inn innreiing. Litt gjenstår altså.

Men lyset har vi!

Bildet under viser kjøkenet. Høgskapa kjem i nisjen der det står ei skuffe – etter planen skal vi få dei lakkert grøne. Nedforinga for ventilatoren heng frå taket og ned. Var veldig i tvil korleis den skulle bli, men eg syns den fungerer bra!

Igjen – kjøkenet, her mot “yttervegg” som vender mot vinterhagen. Veggen er enda ikkje heilt tørr.

Og her i rommet innafor, som er ein bi-inngang og grovkjøken. Og ekstra vaskerom. Fine lyset!

To gamle stolar står berre å ventar på at ting skal bli ferdig, slik at vi kan flytte inn og nyte utsikta… Dei blir nok bytta ut med noko litt meir komfortabelt.

Igjen frå kjøkenet.

Vinterhagen har fått “øyenbryna” på. Det gjorde at denne siste “klossen” begynte å snakke meir saman med utspringet i front av huset (ikkje på bildet). Huset blei samanhengande. No gjenstår berre rekkverk på terrasse, og murpuss, så er utsida ferdig. Inne i vinterhagen står parketten stabla. Den kom i frå England i forrige veke.

No er vi på badet i underetasjen. Som sagt er veggane framleis opne. Det skal lagast boksar i veggen for armaturet. På ein stender har eg hengt ein lapp med skisse over korleis denne veggen skal bli med møblering. Ikkje alltid like lett å forklare til murar, elektriker og rørleggar kva som skal kor… Da er det like greit å lage ei arbeidstegning og få den på veggen. Vi har også tusja på golv og vegger for å vise møblering. Det er satt inn to vindu i veggen. Under kjem det to lampar, deretter spegel, to armatur to stikkontaktar og to vaskar.

Inn døra til vaskerommet / teknisk. Her kjem det vaskemaskin og tørketrommel med benkeplate oppå. Eg håpar berre kassen er høg nok til at vi kanskje kan få bygd kvitevarene litt opp. Kvitevarene er komne forresten – bestilt frå Danmark og stua inn i boder og skap her vi leiger. Platetoppen ligg under dobbeltsenga.

Resten av teknisk er ein imponerande spaghetti.

Og til sist frå tv-stova nede. Enn så lenge er mest heile trappeholet dekt av plater, men når dei er borte vil det komme lys ned her frå overlysvindua oppe. Eg trur vi vil sette pris på å få litt morgonlys ned hit!

Arbeidet går jevnt og trutt framover, og ingen problem har vore større enn at dei kunne løysast. No prøver vi så godt vi kan å halde tak i økonomien slik at vi ikkje får altfor mange tillegg på tampen. Tillegg blir det, men vi prøver å manøvrere oss bort frå det som gjer altfor vondt!

Bilderas

Som vanleg ikkje tid til å blogge – men arbeidet der oppe går jamt framover. Her er ein del bilde frå i går. Snart er all gips komme på plass- Hovedetasjen er så godt som ferdig. Veldig kjekt å sjå korleis lyset fell inn i huset – og gler meg til å få maling på veggane

Bildet under er tatt frå enden av gangen mellom bad og gjesterom oppe  og inn mot stove og kjøkken. Døra i enden av gangen er ut til vinterhagen.

Her er meir av kjøkenet. På veggen midt imot kjem kjøkkenhalvøya ut.

Her er frå inngangen. I kvar kortende av rommet blir det garderobeskap

Her er frå badet oppe. Vi ventar litt på avklaringar, pris etc, når det gjeld innebygd armatur og diverse. Kassen til venstre i bildet skal ha innebyggingsarmatur for vask og badekar (i hjørnet), og bli kledd med mosaikkflis. Over kassen blir det ein stor spegel frå vegg til vegg, med lampepunkt i spegelen. Resten av badet har vi faktisk kjøpt flis til allereie – heilt ordinære kvite, blanke fliser som er 30×60, til 45,- per kvm. Om lag same pris har vi gitt på heilt standard grå golvfliser i 30×30. Ingen skal påstå at flisene er påkosta i dette huset….

Grovinngang oppe. Vi lurte på om dette rommet ville bli mørkt, smalt og trangt, men vi er fornøgd med plassen mellom inngangsdør og kjøkkendør, og at takvinduet gir lys til heile rommet. Kjennes ikkje trangt ut i det heile tatt! Løysinga på vindu er den same her som førre bilde (badet).

Her frå kjøkkenet. Døra midt i bildet er til grovinngangen. Døra vi skimtar ved sida av er til hovedinngangen. Nisjen i venstre bildekant er for fire høgskap. I dag bygger dei ein kasse som skal ligger over skapa, og gå opp til nedre kant av veggen under overlysvindua. Røyret som heng ned i høgre bildekant el for ventilator som skal henge ned her over kjøkkenhalvøya. Det må byggast ein kasse for ventilatoren ned frå taket. I nisjen til høgre kjem benkeskap og overskap.

Same som over, men i annan vinkel. Mot veggen kjem det 6 benkeskap  med kjøkkenvask, oppvaskmaskin og kjeldesortering. Over benken, heilt vanlige overskap.

Underetasje. Dette er TV-stova. Det runde trappeholet blir fint! TV kjem på veggen midt i bildet, sofa vis a vis.

Håpar dette skal vere nok punkt for TV og alskens dippeduttar

Foreldresoverommet er blitt isolert, og har nok blitt gipsa i løpet av i dag.

Her er frå badet nede. Det fine lyset inn frå tv-stova og det store vinduet var for smertefullt å gje slepp på – særleg sidan rommet manglar dagslys. Så vi har bedt om å få inn to 25 cm. høge vindu heilt oppe mot nedforinga av taket. Det blir så høgt oppe på veggen at det ikkje er noko innsyn. Vi droppar dette i dusjsonen innerst i rommet (mot murveggen), men legg dei inn over vaskane. Også dette badet skal ha innebygd armatur. Baderomsinnreiing har blitt bestilt hos Kvik – dei hadde fine, firkanta heildekkande vaskar utan hol for kran. Flisene her nede blir dei same som flisene på bad oppe. Enkelt og greit.

Det har sin eigen estetikk dette også. Teknisk rom. Rørleggar fått på plass alt av sine røyr. Ventilasjon er lagt, og det er bora to digre hol i muren for luft inn og ut. I hjørnet skal dei etter kvart få løfta på plass eit monster av ventilasjonsaggregat (som ga meg hakeslepp). Ved sida av skal elektrikar få lov å få litt plass til  sine ting. At teknisk rom krev litt areal er ikkje tull. Berre rørleggergreiene har lagt beslag på ein heil  vegg aleine!

Ut ein tur. Det er støypt ein kant under vindua nede. Så skal vi få lagt elvestein langs med husveggen, deretter betongheller og plen.

Vi har bombesikkert fundament for terrassen. Eg trur folk mistenkte oss for å bygge helikopterplattform. Oppå her kjem det altså terrasse i komposittmateriale.

Og sånn ser det ut no.

 

Vinterhage er på plass!

Nok ein merkedag – på fredag blei vinterhagen montert. Den har vi venta på ei god stund av diverse årsaker, og det var kjekt å få den på plass!

Det ser litt ut som at vi skal starte restaurant-drift der oppe på kanten… Bildet under viser vinterhagen frå anna hald, og forskaling for terassefundament.

Det blir eit bra rom å vere i. Trur det blir fint å kunne sitte her i vintersola. Og dette er også den delen av huset som har tidleg morgonsol – dei morgonane vil eg tøfle ut hit med kaffekruset.

Bildet viser at hjørnet manglar eit siste beslag som skal på plass, elles er her ferdig (bortsett frå fliser da). Rommet har to opningar ut, ein mot den delen av terassen som kjem ut i front, og ein til bakre del av terassen.

Inne er gipsplatene i hovedetasjen begynt å komme på plass. Kjekt å sjå romma ta form og at overlyset frå mønet gir behagelige lysforhold. Bildet under er tatt mot det lange kjøkkenvinduet i front. Veggen som ikkje har fått gips er mellom kjøkken og stove. Her blir det høge bokhyller i stova og ein vegg med høgskap på kjøkenet. Børsten mot veggen står om lag der omnen vil komme.

Bildet under viser det store utspringet i front.

I veka som var hadde vi møte med rørleggar og gjekk gjennom kva vi ønsker av armatur og innreiing på bada. No ventar vi på pris. Sidan vi er så fryktelig glad i å gjere ting komplisert for oss sjølve, så har vi valgt å ha armatur rett ut av vegg. Vola sine klassikerar strauk vi raskt av lista – fryktelig fine, men uaktuelle i vårt budsjett. Men Axor Uno frå Hansgrohe er ikkje langt unna da, til ein finare pris (bilde frå vvskupp)

Eller kanskje Pura Vida av samme merke?

Ved å velge veggmonterte kranar, så har vi lite å velge i når det gjeld vask og møbel. Dei fleste vaskar har jo hol til blandebatteri. Ein rund bolle vil vi ikkje ha, men derimot noko firkanta, fortrinnsvis noko som dekker heile skuffeskapet. Rørleggar har funne ein som kan underlimast i ei komposittplate (f.eks frå Diapol), men det ser ut til at vi også kan få til noko hos Kvik. No ventar vi litt på prisar, og får sjå kva det blir til.

Elles kan eg rå folk til å ta ein kikk på Kvik sin planleggar for bad, kjøkken og garderobe. Sjølv den som ikkje planlegg å handle der kan bruke programmet og få litt inntrykk av korleis rommet blir i både 2d og 3d. Alt blir lasta ned på eigen pc og filene lagra hos deg sjølv. Fleire av møblane er skalerbare, og generelt sett er det heile langt lettare å bruke enn t.d Ikea sitt teikneprogram.

Ting

Det er ikkje lett å innreie eit hus som berre finst mentalt. Slik har det vore nokre år no, men no når det nærmar seg at vi har eit materielt hus ein kan gå inn i, har vi begynt å skaffe ein del av dei tinga som skal inn i dette huset. Vi kjem til å  bruke det vi har frå før, og noko som eg finn på loftet heime der eg voks opp. Men noko nytt vil det  vere trong for.

I vinter hadde Bolia sett ned prisen på sovesofaen som vi visste vi ville ha til gjesterommet / kontoret i hovedetasjen. Den blei bestilt og kom for ei veke sidan. Det er trist å ikkje opne den store pakken, men eg stoler nå på at den er fin… Slik skal den vere; Scandinavia sovesofa i Mind stoff lys grå. Einaste forskjellen til vår er at vi valgte bein i eik.

Elles har eg tidlegare fortald at lampen Random Light er bestilt. Den er nå kommen, og står i ei diger øskje i stova vi leiger. Vi kjøpte LED- versjonen, og satsar på lite lyspæreskift i åra som kjem.

Og så ventar vi på kvitevarene frå Danmark. Vi hadde to val – enten å kjøpe billige kvitevarer (bruke pengar på noko anna i staden), eller å “fleske til” og skaffe oss det vi eigentleg ville ha no med ein gong. Med gode prisar frå Danmark, så valgte vi å fleske. Platetoppen er t.d. meir enn ein halv gang dyrare i Norge.

Her er det vi ventar på (bilde frå Siemens)
Kombiskap

Ovn

Kombiovn (vanlig ovn kombinert med damp)
Som vi kjøper hos Norema, for denne greide ikkje danskane skaffe i svart. Ovnen kjem i ny modell i mai, og eg finn ikkje bilde på nett, men får stole på at den passar saman med vanlig ovn. (og treng ein to ovnar spør du?). Nei gjer ein det? Eg har ønska meg to ovnar i lang tid, for eg er lei av å sjonglere med ulike rettar som skal steikast samtidig. Og så gler eg meg til damping av fisk og grønsaker.

Varmeskuff

Platetopp

Av andre ting som er i boks er Cilindro ventilator frå Rørosmetall (via Norema) og Rais Viva peisomn via Varmefag. Elles: kjøken i Abstrakt kvit høgglans frå Ikea, og fire høgskap frå Norema. Desse kjøper vi i kvit mdf, og får dei lakkert hos Bergen Billakkering. Grønt er skjønt!

Elles skal vi bruke det vi har frå før: nokre skeive, heimesnekra barnesenger, vår smale rammemadrass frå IKEA, ein nedsleten, nuppete sofa, eit utslete kaffebord (som er reparert med metallplater), eit umoderne kjøkenbord med stolar og eit direkte stygt tv-møbel. Bokhyllene i bøk må vi også leve med ei stund. Sånn går det når ein absolutt skal ha platetoppen ein absolutt skal ha.

Bli lys!……. (og litt om avløp og puss)

Eg hadde ikkje heilt sett for meg husa sine hemmeligheter – alt som ligg kamuflert inne i veggar og tak. Eitkvart moderne menneske veit jo at ein treng straum og vatn i eit hus, men lite visste eg kor mykje plass det må ha, og kor krevjande det er å få det tilpassa og smetta og snudd gjennom, over og under. Og i dag har eg sett at eit avløp frå eit toalett ned gjennom kan vere reine skulpturen. Det var nesten litt vakkert der det samla to nedløp frå taket i etasjen over, dreide seg mot veggen, sklei nedover, bende seg inn i veggen, og forsvann ned i golvet og forhåpentligvis ut under huset. Med ein sokk på, for å dempe støy og sus. Røyret skal få stå sånn, eksponert, for her er vi på teknisk rom, og det skal få vere….. teknisk. Så får vi sjå om eg blir lei av å tørke støv av avløpsrøyret mitt.

Sol over heile Vestlandet i dag. Vi gler oss over dei store vindua i karnappet. Dette blir bra både i solskin og snøstorm

Alle stenderar i vegger ser ut til er komne opp, og alle tak er lekta ned. Det er klart for gipsing. Elektrikar har vore i sving i forrige veke, og punkt for elektrisk er i ferd med å komme på plass. Sidan vi er litt over normalen glad i pendlar, og litt under normalen glad i spottar, så er det ein del som må avklarast no. Særleg når ein heller ikkje vil ha støpsel oppe ved taket for pendlane. Plassering av takpunkt må da vere nokså nøyaktig over der vi skal ha bord, og da var det best at vi sjølve bestemte nøyaktig kor dei skulle komme. Så det fekk vi gjort i dag, godt utstyrt med måleband, snor og lodd, planskisser og sprittusj. I same slengen som vi markerte takpunkt, så fekk vi tatt ein del andre viktige ting som surround og lyd.

Og nå når vi kan oppleve romma meir, så har vi høve til å legge inn endringar før det blir for seint. Heldigvis var det ikkje så mange, for bildet under representerer ein del lappar….

Vi brukte lengst tid på å finne ut kor dei tre pendlane over kjøkkenhalvøya skulle henge. Nøyaktig liksom. For først måtte vi finne ut kor øya kom. Og så måtte vi sjå for oss kor tett pendlane skulle henge… Mannen satsa på rein matematikk, medan eg satsa på å lukke augene og visualisere og finne balanse…. Men vi kom nå i hamn på eit vis og fekk teikna opp nokre piler høgt der oppe ved mønet. Borda på tvers er feste for ventilatoren, og utkastet skal vere på den vesle veggbiten mellom vindua.

To pendlar over spisebordet måtte på plass. Først må ein finne ut kor stort spisebord ein har/planlegg å ha. Deretter – kor skal det stå i forhold til veggar og benker? Kor stor plass treng stolar? Og kor breie lampar skal vi ha over bordet (eg ser for meg to som er store, ca 50 cm. i diam). Vi endte opp med å tusje bordet rett på golvet og plassere pendlane etter dette. Ikkje for langt frå kvarandre, men ikkje for tett heller. Når punkta var plassert vart punktet i taket funne ved hjelp av snor og lodd.

Kva lampe? Vel, nå har vi investert i dyr pendel til stova, så lommeboka har mest lyst på to stk. Brasa frå IKEA. Dei er fine i formen og har innvendig blending. Helst ville eg hatt raude, men nå ser eg dei berre i kvitt og svart?

Og til sist eit bilde frå utsida. Murpussen ser ut til å bli veldig bra – og eg er fornøgd med fargen mot både treverket, vindua og dei grå platene.

Kva skjer i veka som kjem? Arbeidet med røyr held fram. Innan mandag må vi avgjere om vi skal ha vasskranar på badet som kjem ut av kasse på vegg, eller er montert fast i vasken. Elektrikar trekker sine ting vidare, murar pusser meir (hurra for solskinn!) og tømrar går i gang med gipsing. Kanskje aller mest spennande – vinterhagevindua er komne og skal opp. Det skal bli bra å få bort dei siste presenningane. Horisonten vidare har eg ikkje full oversikt over, men malaren kjem i midten av april, golvet frå England kjem første veka i mai, og kjøken og trapp i slutten av denne månaden. Og i stova vi leiger hopar ting seg opp. Vi har ein sovesofa innapakka i papp, ein fantastisk Random Light pendel som tar noko over 1 kubikkmeter, og snart skal vi ta i mot kjøkenomn, platetopp, kombiskap, varmeskuff, oppvaskmaskin, tørketrommel og vaskemaskin sendt frå Danmark. Skal tru om vi får plass under senga?

Isolasjon, ventilasjon, betong, mur, plater og puss

Eg har mykje anna å finne på enn å skrive innlegg på bloggen, derfor går det litt tid mellom kvar gong. Så har eg desto meir å fortelje, for no har det skjedd mykje sidan sist. Først kom betongen, og no er vassrøyra forsegla for lang, lang tid framover. Så kom isolasjonen til taket, og den er blitt lagt på plass. Samtidig med at vi fekk skipa til eit aldri så lite kranselag, så kom ventilasjonen og gipsplatene. Veldig praktisk at det da var masse folk i huset (murar, tømrerar, elektrikerar og rørleggerar), og dei blei satt i sving til å bere alt inn i eit forrykande uver førre veke. Dei blei belønna med wraps, muffis og kaffe, og verka glade for det. Vi er i alle fall veldig, veldig glade for den gode innsatsen alle har gjort så langt!

Bildet viser stova oppe – betonggolvet er ferdig, trappeholet ser  ut som eit rundt trappehol skal sjå ut, og isolasjonen til taket ligg klar.

Etter at isolasjonen var komme på plass har dei lagt opp plast (for å stoppe varm, fuktig luft å trenge inn i isolasjonen)(alt man lærer når ein bygger hus altså), og har så begynt å lekte ned. Medan dette har pågått har ventilasjonsanlegget blitt drøfta og planlagt. Utkast og innkast i det DIGRE skapet var sjølvsagt ikkje ideelt plassert. Dei to kanalane må krysse kvarandre nede i teknisk rom – men det skal vere plass til dette uansett.

Her er ein liten del av ventilasjonsanlegget – litt absurd at vi skal gje plass til alt dette spetakkelet inne i veggane.

Muren ute er blitt heilt ferdig. Det skal støypast ein betongkant i flukt med dragaren midt i bildet.

Muren er vår største budsjettsprekk – men vi valgte den med vitande vilje. Eg syns den fungerer godt mot huset – eg likar fargen og strukturen. Den vil bli litt dempa når det veks opp noko grønt nedafor, og vil også gjere mindre av seg når verandaen blir forlenga over muren og det kjem opp rekkverk i glas. Men elles er eg glad for at mykje av muren er godt synleg, for eg syns den er blitt veldig fin!. Og det skal bli godt når glasa i vinterhagen kjem på  plass rundt den 26.

Her er litt meir av fasaden mot vest. Eg trur vi får ein fin uteplass her framfor soverom og TV-stove

Parkett er bestilt og vil komme til tomta den 7. mai. Når det gjeld kjøkken og kvitevarer har vi bestemt oss. Det blir IKEA på alle benkeskap og overskap, Norema på dei fire høgskapa, kvitevarer frå Danmark  til  ein brøkdel av prisen, og benkeplate i kvit kompositt frå Diapol. Og etter alle dei grå og fargelause bilda så langt i innlegget må eg vise fram to tapetprøvar frå Missprint. Og nei, eg tenker ikkje på heile rom dette her, men ein aldri så liten småvegg kanskje?

Sist men ikkje minst har vi to vaksne i familien satt oss ned nokre timar og bladd gjennom alt av papir og betalingar som er gjort for å finne ut kor vi ligg i det økonomiske landskapet. Det måtte gjerast, for no er vi komne inn i den berykta fasen der alt plutselig blir dyrare. Og dei problem og ekstra ting som dukkar opp nå i innspurten må vi betale oss ut av, for vi er to vaksne i full jobb (+litt meir) som ikkje har sjangs å slå i ein spiker ein gong.  Men vi er innafor budsjettet, dvs dersom ein reknar med dei 10% som var satt av til budsjettsprekk. Eit raskt overslag over det vi har betalt og det vi forventar å betale viser at huset truleg vil havne ein stad mellom 20 000 og 21 000 per kvm, og det syns vi er bra. Det inkluderer natursteinsmuren, kjøkkeninnreiing med gode kvitevarer, energibrønn, vv-varme, parkett og flis.

Heldigvis har eg gratis interiørkonsulentar. Her er dei i sving med å finne ut kva farge vi skal ha inne.

Aller siste nytt: I dag var murar i sving med murpuss ute! Fargen ser veldig bra ut, passar veldig godt til platene og beslaga!

Vannbåren vår

I takt med lovnad om vår (og sommar, med innflytting) fell fleire ting på huset på plass. Førre veke vart vannbåren varme lagt ut. Vi har valgt å legge det i støyp i begge etasjane. Ein rask pep talk måtte til for å vere sikker på at det vart laga hol i leca-planken til alle ting som skal gjennom etasjeskillet. Dette inkluderte hol for det elektriske. På grunn av murvegger er ein del trekkerøyr lagt i taket i underetasjen, og deretter opp gjennom etasjeskillet nær der elektrisk punkt skal vere. Det var også ein liten jobb å forskale for trappeholet. Dette blei reine kunstverket:

Her slyngar sløyfene seg mellom enden av kjøkkenøya (til venstre) og rekka av høgskapa til høgre. Ved veggen, midt imot og nede ved golvet er friskluftstilførsel for peisovnen.

Litt meir av kjøkkenet, mot vinterhagen.

Badet oppe.

Og så kom sementen… Og alt blei så fint atte.

Her er “karnappet” vårt. Utsikten blir fint her – gler meg litt til regn og uver mot ruta! Kva vi skal ha av møblar her ute er ikkje spikra, men eg trur i alle fall det blir ein gammal divan etter mi farmor, eit rundt kaffebord og nokre lenestolar kjøpt på Ikea for ca. 10 år sidan. For råd til særlig nytt har vi ikkje! Dessutan er både stolane og divanen fine…

Nede. Får inntrykk av korleis det blir med vindu heilt ned mot golvet.

Ute held arbeidet fram; først og fremst har dei starta opprydding rundt huset – godt å få bort skrot. Arbeidet med stripefundament for terrassen skal nå begynne, og så skal vi vel snart få på puss på veggane.

Gler meg til puss her … Nordvesthjørnet. Poden sitt soverom nede og kontor/gjesterom oppe.

Hallo hus! Ein får ikkje rette inntrykket før vinterhagen er montert og der er kome rekkverk på verandaen i front.

Prosessen med å velge farge på ytterdør var like frustrerande som prosessen med å velge farge på murpuss. Pussen er den grå på bildet- valgt for ei god stund sidan, og vi trur og håpar den skal bli ok. Valget blei tatt ut frå denne vesle klatten på maks 4 cm i diam. Dette skal så overførast til eit digert hus… Nåvel, vi får tru det går bra. Fargen på døra la eg saman med fargeprøven. Men skulle vi ha grøn dør? Blå? Grå? Svart? Det blei raud. Eg er veldig glad i rødt, og blått og grønt er da så trist bakgrunn for julekransen på døra? Upraktisk… Så rødt blei det, nærmare bestemt den mørkaste som ligg mot det grå.

Det har vore vinterferie denne veka – særs nyttig for å kunne få på plass ein del detaljar. Parkett er bestilt; dessverre endte vi med å bestille frå England. Synd for dei norske butikkane, men når prisforskjellen ETTER frakt og norsk moms er 50.000,- blir valget ganske klart. Parketten heiter Kahrs Oak Brighton og blir levert på tomta i byrjinga av mai.

Når det gjeld kvitevarer visste vi at vi hadde ikkje råd til dei 80 000,- til 100 000,- som norske butikkar skal ha… Da hadde vi valget mellom å velge heilt ok kvitevarer, f.eks frå Ikea ( som faktisk er svært rimelige!) eller sjå over dammen. I Danmark opererer dei med halve prisen på det meste. Min uoppnåelige draum om diger platetopp frå Siemens blir plutselig ikkje så uoppnåelig likevel.. Vi snusar vidare på det, og eg får rapportere korleis det går.

Trappa har eg også “jobba” med i vinterferien. Vi ønsker oss aller helst rekkverk i glas, bolta fast langs innsida av trappeholet. Men vanlig glas kan ikkje ha så krapp krumming. Så nå ser det ut til at det blir pleksiglas i staden – som faktisk ikkje er noko dårligare. Er spent på om vi får det til – men eg meiner at trappa blir finast utan “leikegrind” rundt holet.

Det som skjer i neste veke er først og fremst at taket skal isolerast og innerveggane skal opp. Deretter gipsing. Yttervegger skal få vere i mur, men dei må pussast fint. Eg vil tru at arbeidet med fundament for terrasse blir ferdig. Enn så lenge nyt eg opplevinga av store golvflater og lite veggar. Gruar litt for korleis det blir når veggar reiser seg. Eg forstår at dei aller fleste får bittelitt panikk, for da ser alt så trangt og lite ut…

Men eg kan alltids trøste meg med at eg i går bestilte drømmelampen – som skal henge under mønet like ved trappa. Berre dette faktum gir meg ro i sjela. Random Light, Moooi, kjøpt hos room21.no. Og da trur eg lampebudsjettet var brukt opp for i år!

Varmt hus

Det er vel nesten to veker sidan forrige post. Det blir lita tid til å oppdatere her når ein er to vaksne i full jobb som berre har nokre knappe kveldstimar til å diskutere dørfargar og veggbredder. Det er bra det finst epost, for mykje av kontakten med dei som bygger skjer på det viset. Men arbeidet på huset har gått framover – i rykk og napp. Ein del viktige avklaringar er blitt gjort. Først og fremst fekk vi tatt ei avgjerd på ein del ting rundt vinterhagen. Det dreide seg om HUP’ar og vindusprofilar, aluminium og stål og ikkje minst fargar. Det som er spennande er at vi landa på at vindua i vinterhagen får koksgrå innramming – same farge som vindu i resten av huset. Ikkje berre utvendig, også inne. Det trur eg blir veldig bra og vil harmonere med tak og detaljar. Arbeidet med natursteinsmuren som støtte for vinterhage og terasse har også blitt ferdig desse to vekene. No skal det støypast eit stripefundament for terassen – men dette arbeidet vert ikkje gjort heilt enno. For no har nesten det viktigaste komme på plass – tett tak.

Eg kjørte opp på tomta i ettermiddag og tok bilde. Her er folk frå Protan i sving. Taket mot aust er ferdig, og i dag la dei på listene og tak på vinterhagen. Garasjen er også gjort. Eg er så veldig glad for at fargane passar så godt i hop. Eg syns dei store platene i mønet (Cembrit) er fantastisk fine – same plater er brukt på huset sine to utspring i nord og vest. Svart takpapp blei bra til, og stålbeslaga (colourcoat) passa også fint inn på toppen av mønet og rundt vindua. Veldig glad for at alt dette harmoniserte.

Vidare har vi hatt ein del fram og tilbake om innvendige taknedløp eller ei, men endte på innvendige, sidan dette er råd frå Sintef når det gjeld flate tak. Dette blir altså kun for dei to små flate taka på huset – elles har vi vanlege taknedløp som anna folk.

Trappa har vi også begynt å lande på. Det runde trappeholet skal vere 220 bredt for å gje plass til ei trapp på 210 i diameter. Ut frå dette vil kvart trinn vere ca. 90 cm. Smalare enn det kan vi nesten ikkje ha det. Men breiare hol vil vi heller ikkje ha, for da tek det for mykje av golvet oppe. Eg trur det blir bra. Rekkverkt rundt er enno i det uvisse, men eg skal i alle fall undersøke pris på bua glas rundt holet før eg slår det frå meg som vanvittig dyrt. Eg trur det er vanvittig dyrt.

Omn bestemte vi forrige helg, og her har vi gjort avtale med Varmefag om både levering og montering av ein Rais Viva 120.  Det var liksom ingen tvil i butikken – veldig fin og elegant, god å ta i og godt handtak. Eg trur vi skal bli godt fornøgd. Kva vi skal ha under denne peisomnen veit vi enda ikkje. Eg har vurdert ei støypt plate i kvit betong, men glasplate på parkett er sjølvsagt også eit alternativ. Det var litt viktig å få avklart kva omn  vi skulle ha, for det skal fresast opp eit spor til friskluft. Da måtte vi vite litt meir om kor stor omnen blir, og kor dette røyret skulle leggast.

Vinda til vinterhagen kjem ikkje før om ein seks vekers tid. I mellomtida har dei dekka til med presenning, og da ser vi litt betre konturane av den. Når ein kjører forbi på vegen nedanfor feltet ser huset litt meir komplett ut.

Og i ettermiddag fyrte dei opp eit digert beist nede i underetasjen. Då eg kom opp der var det allereie byrja å bli varmt i huset, særlig nede. Isen som låg over golva hadde smelta, og dei dreiv og spadde vatn i bøtter og heiv ut. Ei helg med dette dyret skal nok gjere underverk i huset!

Tidleg i neste veke vert det laga forskaling for trappeholet. All isolasjon i golva vert lagt, og deretter feste for vassbåren varme. Elektrikar legg ein del trekkerøyr som skal ligge i golva (for bl.a. å spare slissing i veggar). Siste bit av taket vert lagt på. Om eg ikkje tar heilt feil legg dei beslag på garasjen. Over helga igjen kjem rørleggar og legg vassbåren varme. Etter det kjem det påstøyp både oppe og nede, og først då vert trappeholet klart, slik at det vert støypt saman med sjølve golvet. Deretter skal det borast hol til alt som skal trekkast mellom to etasjar – vassrøyr, el-røyr, sentralstøvsugar og ventilasjon.

Stillstand

Trasketur til tomta ein fin vinterdag. Huset ligg på kanten midt i bildet.

Det har vore stillstand i ei veke. Vi ventar på taktekkar, og har har hatt ein del fram og tilbake med korleis vinterhagen best skal konstruerast. Arkitekt og murar har også blitt einige om korleis overgangen mellom mur  og tak skal bli.  På bildet over ser de vinterhagen til høgre på huskroppen. Det vi håpar å få til er limte vindu i hjørna og slanke stålstøtter for å halde taket oppe, slik at veggane blir mest mulig glas og minst mulig gods. Vi håpar det skal bli bra!

Vi har bestemt oss for malar. Og då har eg og begynt å tenke på fargar inne. Det er ganske overveldande å skal velge farge for eit heilt hus. Eg vil ha det så lyst som mulig, men ikkje kaldt. I helga har eg prøvd å finne ut av NCS-systemet, og kom eit godt stykke på veg hos Ifi. I går henta eg meg fargelappar. Eg sanka inn ein heil serie av kvitt iblanda svart, og starten av skalaen er vist på bildet under. Her er det ingenting med farge, og slik unngår ein heilt gulskjer på veggene. Men mitt problem da er at dette blir litt trist og kaldt trur eg…

Så da må ein kanskje vurdere fargar med noko gult og/eller rødt i.

Måten fargane er vist på bildet er på ingen måte slik dei ser ut eigentleg! Alt blir forvrengt gjennom telefon-kamera og ut på PC-skjerm, men eg tok nå bildet med for å illustrere valgmulighetene. For eg lider valgets kval, men ser at “Letthet” kan vere aktuell, det same gjeld “Refleksjon”. Omtrent alle velger “Chi” for tida. Sjølv er eg redd den blir altfor kvit og kald. Særleg på fire meter høge vegger. Elles kan også heilt andre fargar vere aktuelle. I TV-stova nede er det absolutt aktuelt å male ein heilt mørk farge på veggen der TV skal henge. “Matrix” er kanskje ut frå namnet, ein aktuell farge? Mange velger tapet for tida – eg er ikkje der heilt enda – men det er ikkje uaktuelt. I så fall blir det ingenting barokk eller søtt, men heller noko geometrisk.

Elles har eg også snakka med både Kvik og Designa. At vi skal ha IKEA-kjøkken er allereie bestemt, men kvitevarer skal vi nok skaffe andre stader. At kvitevarer er dyrt har eg vore klar over lenge, men det er likevel litt demotiverande å ta fram kalkulatoren når ein skal plusse saman alt ein har lyst på. Toppmodell av alt kan eg nok berre utelukke! Så da må ein prioritere, og det ser ut for at vi kjøper nett den platetoppen vi vil ha, og så får vi heller vere meir nøktern på det andre. Vi ønsker oss denne frå Siemens:

Og grunnen er at eg SKAL ha induksjon, og eg SKAL ha plass til minst 5 gryter. Eg er over normalen interessert i å lage mat, og eg balanserer svært ofte fleire gryter enn normalt på komfyren sidan jentungen har matallergi. Kvik tilbyr denne noko lågare enn listeprisen, men det er meir enn dyrt nok likevel…

Det er på tide å bestille trappa snart, for den skal også produserast. Og så må vi vel gjere eit valg av golv om ikkje så lenge. Det kan sjå ut til at det blir bestilt frå England, men det er ikkje bestemt endeleg enda.

No håpar vi på at det blir meir aktivitet på huset i veka som kjem!

Alle vindu og glasdører er på plass!

Ein liten milepæl er nådd; i dag, ca. kvart på fire på ettermiddagen, vart siste døra montert. Eg var tilfeldigvis der. Kjørte forbi for å hente ungane på SFO, og kunne sjå frå vegen at fleire vindu nede var på plass. Da måtte eg svinge opp og fekk tatt bilde når døra ut frå TV-stova til hagen vart buksert på plass. Bildet under viser korleis huset ser ut like før det mørkna i ettermiddag.

Det lyse tømmeret til høgre i bildet er taket på vinterhagen. Vindua her kjem seinare. Under det lange kjøkenvinduet i høgre del av sjølve huskroppen er terrassen påbegynt. Terrassen vil halde fram forbi vinterhagen og ut i høgre bildekant.

TA DA! Siste døra! Det har vore veldig mange tunge løft for tømrarane – sikkerhetsglas i trippelt lag blir mykje tyngde.

Fint blir det. Og fine muren som gir støtte for vinterhagen! Betongkanten oppå vil vi nok forblende. Vinduet nærast muren er i jentungen sitt soverom. Ho har dør ut til hagen. Deretter kjem foreldresoverommet med dør ut her også. Litt smale dører, men god grunn til å halde seg slank!

Blir nok litt annleis her når stillas er fjerna, men litt inntrykk får ein likevel. Har ein liten jobb å gjere i “hagen” ser eg…

Til sist eit raskt sveip opp til den påbegynte terrassen. Ein smal tarm skal sno seg rundt hjørnet ved vinterhagen og halde fram på framsida av huset, under kjøkenvinduet. Eg trudde det kom til å bli litt smalt her, men ser at her blir det plass til både benk og eit lite bord. Her sit vi heilt skjerma for innsyn også. Kanskje vi kunne trenge ein utekontakt til vaffeljernet her på veggen?

Er litt som skjer for tida med andre ord! Metallbeslag som skal på i mønet og rundt vindua i utspringa kjem muligens i slutten av veka – då får eg sjå om eg får tatt nye bilete.