Archives for category: Lys og lampar

Det er ikkje lett å innreie eit hus som berre finst mentalt. Slik har det vore nokre år no, men no når det nærmar seg at vi har eit materielt hus ein kan gå inn i, har vi begynt å skaffe ein del av dei tinga som skal inn i dette huset. Vi kjem til å  bruke det vi har frå før, og noko som eg finn på loftet heime der eg voks opp. Men noko nytt vil det  vere trong for.

I vinter hadde Bolia sett ned prisen på sovesofaen som vi visste vi ville ha til gjesterommet / kontoret i hovedetasjen. Den blei bestilt og kom for ei veke sidan. Det er trist å ikkje opne den store pakken, men eg stoler nå på at den er fin… Slik skal den vere; Scandinavia sovesofa i Mind stoff lys grå. Einaste forskjellen til vår er at vi valgte bein i eik.

20120325-001641.jpg

Elles har eg tidlegare fortald at lampen Random Light er bestilt. Den er nå kommen, og står i ei diger øskje i stova vi leiger. Vi kjøpte LED- versjonen, og satsar på lite lyspæreskift i åra som kjem.

Og så ventar vi på kvitevarene frå Danmark. Vi hadde to val – enten å kjøpe billige kvitevarer (bruke pengar på noko anna i staden), eller å “fleske til” og skaffe oss det vi eigentleg ville ha no med ein gong. Med gode prisar frå Danmark, så valgte vi å fleske. Platetoppen er t.d. meir enn ein halv gang dyrare i Norge.

Her er det vi ventar på (bilde frå Siemens)
Kombiskap

20120325-004416.jpg

Ovn
20120325-004935.jpg

Kombiovn (vanlig ovn kombinert med damp)
Som vi kjøper hos Norema, for denne greide ikkje danskane skaffe i svart. Ovnen kjem i ny modell i mai, og eg finn ikkje bilde på nett, men får stole på at den passar saman med vanlig ovn. (og treng ein to ovnar spør du?). Nei gjer ein det? Eg har ønska meg to ovnar i lang tid, for eg er lei av å sjonglere med ulike rettar som skal steikast samtidig. Og så gler eg meg til damping av fisk og grønsaker.

Varmeskuff

20120325-005809.jpg

Platetopp

20120325-010153.jpg

Av andre ting som er i boks er Cilindro ventilator frå Rørosmetall (via Norema) og Rais Viva peisomn via Varmefag. Elles: kjøken i Abstrakt kvit høgglans frå Ikea, og fire høgskap frå Norema. Desse kjøper vi i kvit mdf, og får dei lakkert hos Bergen Billakkering. Grønt er skjønt!

Elles skal vi bruke det vi har frå før: nokre skeive, heimesnekra barnesenger, vår smale rammemadrass frå IKEA, ein nedsleten, nuppete sofa, eit utslete kaffebord (som er reparert med metallplater), eit umoderne kjøkenbord med stolar og eit direkte stygt tv-møbel. Bokhyllene i bøk må vi også leve med ei stund. Sånn går det når ein absolutt skal ha platetoppen ein absolutt skal ha.

Eg hadde ikkje heilt sett for meg husa sine hemmeligheter – alt som ligg kamuflert inne i veggar og tak. Eitkvart moderne menneske veit jo at ein treng straum og vatn i eit hus, men lite visste eg kor mykje plass det må ha, og kor krevjande det er å få det tilpassa og smetta og snudd gjennom, over og under. Og i dag har eg sett at eit avløp frå eit toalett ned gjennom kan vere reine skulpturen. Det var nesten litt vakkert der det samla to nedløp frå taket i etasjen over, dreide seg mot veggen, sklei nedover, bende seg inn i veggen, og forsvann ned i golvet og forhåpentligvis ut under huset. Med ein sokk på, for å dempe støy og sus. Røyret skal få stå sånn, eksponert, for her er vi på teknisk rom, og det skal få vere….. teknisk. Så får vi sjå om eg blir lei av å tørke støv av avløpsrøyret mitt.

Sol over heile Vestlandet i dag. Vi gler oss over dei store vindua i karnappet. Dette blir bra både i solskin og snøstorm

Alle stenderar i vegger ser ut til er komne opp, og alle tak er lekta ned. Det er klart for gipsing. Elektrikar har vore i sving i forrige veke, og punkt for elektrisk er i ferd med å komme på plass. Sidan vi er litt over normalen glad i pendlar, og litt under normalen glad i spottar, så er det ein del som må avklarast no. Særleg når ein heller ikkje vil ha støpsel oppe ved taket for pendlane. Plassering av takpunkt må da vere nokså nøyaktig over der vi skal ha bord, og da var det best at vi sjølve bestemte nøyaktig kor dei skulle komme. Så det fekk vi gjort i dag, godt utstyrt med måleband, snor og lodd, planskisser og sprittusj. I same slengen som vi markerte takpunkt, så fekk vi tatt ein del andre viktige ting som surround og lyd.

Og nå når vi kan oppleve romma meir, så har vi høve til å legge inn endringar før det blir for seint. Heldigvis var det ikkje så mange, for bildet under representerer ein del lappar….

Vi brukte lengst tid på å finne ut kor dei tre pendlane over kjøkkenhalvøya skulle henge. Nøyaktig liksom. For først måtte vi finne ut kor øya kom. Og så måtte vi sjå for oss kor tett pendlane skulle henge… Mannen satsa på rein matematikk, medan eg satsa på å lukke augene og visualisere og finne balanse…. Men vi kom nå i hamn på eit vis og fekk teikna opp nokre piler høgt der oppe ved mønet. Borda på tvers er feste for ventilatoren, og utkastet skal vere på den vesle veggbiten mellom vindua.

To pendlar over spisebordet måtte på plass. Først må ein finne ut kor stort spisebord ein har/planlegg å ha. Deretter – kor skal det stå i forhold til veggar og benker? Kor stor plass treng stolar? Og kor breie lampar skal vi ha over bordet (eg ser for meg to som er store, ca 50 cm. i diam). Vi endte opp med å tusje bordet rett på golvet og plassere pendlane etter dette. Ikkje for langt frå kvarandre, men ikkje for tett heller. Når punkta var plassert vart punktet i taket funne ved hjelp av snor og lodd.

Kva lampe? Vel, nå har vi investert i dyr pendel til stova, så lommeboka har mest lyst på to stk. Brasa frå IKEA. Dei er fine i formen og har innvendig blending. Helst ville eg hatt raude, men nå ser eg dei berre i kvitt og svart?

Og til sist eit bilde frå utsida. Murpussen ser ut til å bli veldig bra – og eg er fornøgd med fargen mot både treverket, vindua og dei grå platene.

Kva skjer i veka som kjem? Arbeidet med røyr held fram. Innan mandag må vi avgjere om vi skal ha vasskranar på badet som kjem ut av kasse på vegg, eller er montert fast i vasken. Elektrikar trekker sine ting vidare, murar pusser meir (hurra for solskinn!) og tømrar går i gang med gipsing. Kanskje aller mest spennande – vinterhagevindua er komne og skal opp. Det skal bli bra å få bort dei siste presenningane. Horisonten vidare har eg ikkje full oversikt over, men malaren kjem i midten av april, golvet frå England kjem første veka i mai, og kjøken og trapp i slutten av denne månaden. Og i stova vi leiger hopar ting seg opp. Vi har ein sovesofa innapakka i papp, ein fantastisk Random Light pendel som tar noko over 1 kubikkmeter, og snart skal vi ta i mot kjøkenomn, platetopp, kombiskap, varmeskuff, oppvaskmaskin, tørketrommel og vaskemaskin sendt frå Danmark. Skal tru om vi får plass under senga?

Eg sankar trådar. Nøstar saman til noko som kanskje med tid og stunder blir eit hus. Mykje telefonar i det siste.

I dag har eg snakka med arkitekten, entrepenøren for grunnarbeid, brønnboraren, rørleggaren, snekkaren (ein av dei aktuelle) , ein potensiell malar og jammen meg fekk eg drøfta hus med han eg er gift med før han strauk på dør for å jobbe. I det daglege er det meg som er husbyggar og organisator, men større avgjerder vil eg helst at vi tar saman, og det er jammen meg godt å ha ein arkitekt med på laget også. Og når det gjeld val av kven som skal bygge har han gjort sitt val. Korleis kan han berre bestemme seg på null komma nix, medan eg treng tid til å samanlikne, fundere, ringe rundt, sjekke opp, google og kalkulere?

Vi må berre konkludere med at vi (dvs. eg) fekk ikkje bestemt oss før påske. Altså bestemt kven vi ønsker skal stå for oppføring av huset. Men vi har vel ein klar ide om kva retning det går i. No tar vi oss ei veke påskeferie, deretter ein siste gjennmgang med arkitekt,  og prøver å bli sikre i vår sak 😉

Og i morgon kjem energibrønnborarane! Dei vart bestilt for litt over ei veke sidan, og det er fint å få dette unnagjort nå når grunnarbeidet er ferdig og tilkomst og armslag for dei som skal bore er optimalt. Sidan vårt tekniske rom ligg i bakkant, med vegger inn mot jord, blir energibrønnen lagt på framsida av huset. Vatn blir då ført i røyr under huset sin såle, fram til teknisk. Håpar på at det skal fungere greit.

Og eg gler meg berre pittelittegranne (liksom) til eg kan skrive om litt andre hus-relaterte ting enn brønnar, prisar og støttemurar. Dette ER jo svært sentrale og viktige ting ved å bygge eit hus, men ikkje fullgod tilfredsstillelse av mitt estetiske behov. Eg innser at det kanskje finst menneske som ser det vakre i ei perfekt planert flate, eit ryddig prisoverslag eller ei god grøft. Men eg er nok ikkje der.

Så for å bringe inn litt av det eg likar aller mest, kan eg jo putte inn bilde av dei fem siste tinga eg har “kaboodla” under lista “til huset”.

Bilde frå Rais. Evig jakt på omnen. Denne var jo fin?

Oppvaskmaskin må ein jo ha. Denne er frå Asko, og bildet er henta derifra. Det eg likar her at den er stor (ikkje så veldig viktig egentlig), og at der er bestikkskuff (det vil eg ha!).

Denne har jo gått sin seiergang i mange bloggar. Ingen dum idé, men kva når barna veks til og den søte 3-åringen tydeligvis skal på klassefest på fredagen? Bør altså fornyast i ny og ne… Foto henta hos ukeplan.no

Pene vasken. Blancosubline i silgranit. Kjøpe frå Tyskland via Ebay? Hm…

Bromölla frå IKEA

Og pene spotten. For oss som ikkje likar sånne spottar som alle andre likar, så er dette tingen. Og så fra IKEA da, til 300 kroner! Ja takk, eg tar gjerne slike i garderoben, og på badet (dette er for bad). Eg syns kanskje den under frå Ifö er hakket finare, men prisen er over dobbel.

Ifö light on

Sjå der, da blei det litt meir enn berre grus og singel i dagens post!