Heim

Lite nytt i denne bloggen, men det betyr ikkje at det har vore stillstand. Tvert imot. Bildet over fortel vel det.  Dette var den 19. september, ein vanlig onsdags kveld, klokka 21, på håret i tide til å få ungane i seng. Vi bestemte oss der og da at «nå søv vi over». Same dag hadde vi tatt over huset. Skreve under, med tre siders mangelliste.

Sånn ja. Tørke av på beina.

Første frokost…

…i ei rekke av mange måltid. .

På bada set kvardagslivet synlege spor. Vi treng hyller og skap!

Det blei raskt oppdaga at terrassen var ein flott fotballbane / racerområde for sparkehul.

Og vi har sett korleis lavenergivindu er ein tidleg morgon når det er frost ute

Vi har vår eigen versjon av ein berømt ape, hengande i eit av få nyinnkjøp til huset, bordet Tablo.

For vi har ikkje råd til nye møblar i alle rom. Man tager hva man haver. Ei feltseng frå IKEA er ikkje å forakte heilt. Og skal ikkje det teppet dreiast 45 grader skal tru?

… og vi gler oss over lyset

og fargane

Og drar fargane med oss inn. Flott  jobb gjort av Bergen Billakkering

Vi oppdaga at horisonten vår er stor (og at vi treng spisestuestolar utan sprosser og spiler på kryss og tvers)

og at vi har litt å lære om alsken lyspærer. Kva passar her? (Flos Glo Ball)

Vi gler oss over eit godt arbeidskjøkken, som har kontakt med verda der ute

og på bakgrunn av fargen her

så endte vi opp med å bestille dette her (frå BoConcept). Den er i alle fall heilt riktig til påske!

Etter mykje fram og  tilbake, flikking av bilder i photoshop og hake-kløing, bestilte vi nesten svart glasplate til kjøkkenveggen. Om det blir riktig får vi sjå til jul

Vi testar dampovnen

Feirar bursdagar  Ulovlig seint (for vi var jo i ein 4 månader lang flytteprosess)

og generelt nyt livet i huset

Det var eit lite bilderas, som jo ikkje  viser alt vi nå er eigar av. Vi har TV-stove nede, (der den gule sofaen skal), og vi har sjølvsagt soverom til både oss sjølve og ungane. Der er grovkjøkken og teknisk/vaskerom, gang, og garasje. Men det tek tid å komme på  plass, og enkelte av romma er dominert av stablar av øskjer, umonterte IKEA-skap, og leiker som ikkje har funne plassen sin. Vi stressar ikke. Vi putlar på, kjem i orden litt etter litt, og så tek vi ein kaffe med beina på  bordet!

Kva vi syns? Eg likar lister, så da lagar eg det:

Positivt så langt:

• Vi har utsikt men lite innsyn. Vi ser skog og fjell, vatn og himmel, men også ein veg, slik at vi ikkje gløymer vi er del av sivilisasjonen!
• All tida vi har brukt til å tenke kjøkkenorganisering har gitt full uttelling. Det hjalp veldig å ha ein flink arkitekt i utgangspunktet. Ikkje lett å kombinere stort kjøkken og det å få til kort avstand mellom viktige arbeidsoppgåver. Matpakkesmøring skjer ved enden av kjøkkenhalvøya – alt er i nær rekkevidde. Kutting av grønsaker og kjøt skjer i motsatt ende av øya – ved veggen, med eigen vask og eigen søppeldunk – og nært koketoppen. Oppvask foregår ved veggen, men stor kum som berre blir brukt til denslags. Baking innerst i hjørnet. Å organisere alt på plass, frå den minste måleskeia til den digre støypejernswokken har tatt mange, mange timar. Men det å sette i gang baking av havrekjeks er utruleg mykje lettare og lystbetont nå, enn når vi hadde eit trangare og meir komplisert kjøkken.
• To omnar (ein vanlig, ein damp) er i bruk heile tida. Steik i den eine, grønsaker i den andre.  Pizza til oss i den eine, glutenfri i den andre. Angrar ikkje på at vi gjekk for to!
• Grovkjøkken vee kjøkken er veldig praktisk. Her har vi den gamle vaskemaskinen, og kan hive inn oppvaskfiller og handkle frå badet oppe. Eigen kjøkkeninngang er ein av dei beste tinga ved huset. Her har katten maten sin, og her har han si eiga kattedør (som er verdt si vekt i gull).
• Gjesterom like ved badet oppe, som også fungerer som eit ekstra opphaldsrom ved stova til dagleg, er smart (igjen, takk til arkitekten). Eg sit ofte i sofaen og jobbar fordi det litt meir dempa lyset her inne er best for skjermen.
• Karnappet med heile utsikta i fanget er ein favorittplass.
• Overlyset er nydelig
• Utsikta frå golv til tak frå senga i soverommet er også nydelig! Kven treng gardiner da? (dog er plisse bestilt)
• Smuleluke er og blir smart. Vi har tre stk – to på kjøkken og ei i grovkjøkken. Kost-kost,og borte er det.
• Ungar kjem på besøk, og likar seg her!
• Terrassen, som vi trudde var altfor stor, er heilt passe. Nå ventar vi berre på sommaren! Veldig glad vi valgte kompositt; det er behagelig å gå barfot på.
• Vinterhagen er blitt eit flott rom som berre ventar på å bli tatt i bruk. Litt skjerming, og litt møblar, så er vi klare for  sol og lys i vinterhalvåret også! Og nokre tomater kanskje?
• TV-kroken nede er absolutt ikkje for liten. Den er liten nok til å vere intim og «hule-aktig», men stor nok til oss alle (i alle fall når sofaen kjem).
• Fornøgd med fargevala. Chi på veggar, Matrix (mørk grå)  på TV-vegg. Dører er litt for gule mot veggene, særlig ved gyllent lys. Men det er ikkje plagsomt. Også fornøgd med murpuss ute og farge på beis!
• Fornøgd med golv og fliser, trass problema med parketten. Det skuldast ikkje produktet.

Det negative er såpass kort at eg treng ikkje lage liste. Det eg merkar mest er at ein må hugse å ta med seg telefonen over alt, for elles må ein jo springe for å rekke den når det ringer! Neste punkt må vere at det er bittelitt slitsomt å slepe seg opp ei trapp klokka 6 om morgonen for å sette på kaffe. Beina er så tuuunge. Og til sist – vi har litt akustikk igjen å få kontroll over. Lyden frå TV nede ber litt for godt opp i hovedetasjen oppe. Men dette vil betre seg når gardiner nede kjem på plass.

Kjøkkenmontering

Fredag kveld tok vi fatt – ein heil stabel av øskjer frå IKEA og Norema skulle opnast og puslast saman. I ettermiddag blei dei siste skroga satt saman, totalt 28 skrog.

Vi har fire høgskap (Norema), 18 benkeskap og 6 overskap. Så godt som alle skap er 60 brei – vi ville ikkje ha breiare. Nokre er 40 breie. Og nokre skap i øya er 30 djupe for å gi plass til elektrisk søyle midt i øya. Tre skap var for vask (skal ha to vaskar på kjøkenet), og to skap var for platetopp (har 90 brei topp). Alt dette blei eit lite puslespel av kodar og etikettar, men vi fann da ut av det. Og nå er alle skrog klare til snekkeren som skal få dette festa og satt saman. Når det er gjort har vi ny jobb med å få innmat og dører/skuffer på plass.

Det gjekk nokre timar med montering. Men ein er godt hjulpen av ein liten elektrisk skrutrekjar, iskaffe og musikk frå telefonen. Og mat må ein jo ha – første måltid i huset var ikkje spesielt kulinarisk, men det metta i alle fall

Slik ser det ut no. Dette blir i alle fall stort nok (som bestilt), og eg gler meg til å lage mat her! To heile benkeskap til kjeldesortering skal bli bra – gler meg til å bli kvitt stablane av tomme melkekartongar på kjøkenbenken. Ser også at kjøkenventilator løyste seg greit, den kjem der det på bildet heng ei renneløkke – til skrekk og gru?

Da har vi «berre» dette igjen. Og dette er berre den eine haugen av innmat som står på vent..

Status per i dag: parkett er lagt i heile hovedetasje, og på to soverom nede. Dører er komne på plass i hovedetasje. Flis er lagt på alle golv, unntatt bad. Det er ikkje fuga enda. Det er ikkje lista heller. Men det går da veien dette?

Starten på finish

Litt rart å ha komme til siste finish, men vi er nå der da. Det er fint at heile huset står der – med alle sine kilo betong – urokkelig og til Dovre fell. No er det detaljane som tel.

Malarane er nesten ferdige, hovedetasjen har fått sine strøk. Det som gjenstår er litt flikking her og der og eit siste strøk nede. Vi valgte, etter mykje om og men, fargen «Chi». Eg var bekymra for at den skulle bli veldig kald, og særlig bekymra for at den faktisk har ørlite grønt i seg. Men vi måtte ha noko som var veldig kvitt til det kvite kjøkenet vi skal ha. Nå når fargen har komme opp er eg veldig godt nøgd. Chi er ikkje kald hos oss – kanskje fordi vi har mykje lys? Om kvelden blir stove og kjøken fyllt av gyllent ettermiddagslys, og da er fargen varm og fin. Hadde vi hatt noko med meir gult er eg redd eg ville syns veggene vart for gule.

Og vi er så enkle vesener – her er det same farge over alt. Det er Chi på vegger og Chi i taket, frå vaskerom til stove. Ein vegg i stova, den bak TV skal få ein mellomgrå farge som heiter Matrix. Og så får vi sjå når vi har budd oss litt inn om der kjem meir variasjon.

Elles har arbeidet med terassen komme godt i gang. Komposittborda er veldig fine – og vi håpar på fine sommardagar i juli!

Denne veka har mykje skjedd. Parketten vart påbegynt for tre dagar sidan og vart ferdig i hovedetasjen i går. Var veldig spent på om eg ville like den – tenkte at den muligens var for grå, men eg konkluderer med at eg kan like det eg ser. Der er litt meir kvist enn det eg hadde tenkt, men så kan det faktisk vere greit med litt liv i eit golv som er kvitmattlakka og dradd mot det nøytrale.

Flislegging er også i gang. Det er ferdig på grovkjøkkenet og teknisk rom står for tur..

Elektriker er i full gang med å montere brytarar og kontaktar og på tirsdag får vi vanleg straum på bygget. Vi har ikkje noko spesielt påkosta når det gjeld det elektriske. Her er det ordinær Elko med punkt som bygger ein del ut frå veggen. Lite spottar har vi og, men dei spottane vi har er LED, og er sånn sett dyrare enn vanleg. Det er ikkje noko smarthus heller… Men for oss har ikkje dette vore viktig. Det smartaste vi har er muligens ein bevegelsessensor som gjer at lyset i grovkjøkkenet slår seg på når ein kjem inn ytterdøra. Praktisk når ein har hendene fulle med posar. Upraktisk med tanke på at katten skal sove der, og vil slå lyset av og på heile tida…..

Overtaking skal skje innan 1. juli, så no blir det prioritert alt ein treng for å få midlertidig brukstillatelse. Det gjer også ein god bonus ved at då kan byggelånet bli endra til Husbanklån; renta på byggelånet merkes etter kvart! For å få løyve må ein sjølvsagt kunne bu i huset utan fare for liv og helse. Vi treng vatn, toalett og kokemulighet. Trappeholet må sikrast, for vi er ikkje sikre på om trappa kjem i tide, men det er heilt mulig å bu på eit plan hos oss. Vi skal ikkje ha barn i fritt fall… Det viktige no er å få opp kjøkkenet (og der byrjar vår eigeninnsats) og få satt opp fliser på bada slik at rørleggar kan få på plass toalett og kranar.

Om ein månad så er vi i hus. Noko seier meg at vi har nok å finne på i vekene som kjem.

Lys og struktur

Eg vinn nok ikkje prisen for ivrigaste bloggar i år, men eg får trøste meg med at eg i alle fall jobbar det eg skal, er mor slik eg skal, og er prosjektleiar for huset dei timane det tek. Nesten. For det å bygge hus, rettare sagt, å ha andre til å bygge hus for ein, er noko som krev sine timar. Her føl uansett nokre bilde og ei rask oppdatering.

Denne veka har muraren starta med puss inne. Det er neste som kunstverk syns eg, og eg blir beint fram glad av den fine strukturen vi får på veggane som er yttervegger. Kombinert av alt lyset i hovedetasjen så ser vi allereie at her er det kvalitetar som vi kjem til å like. Sjølv utan møblar og fargar av noko slag så er det slik nå at vi helst ikkje vil heim dit vi eigentleg bur for tida.

Vi vil heller vere i det uferdige, umøblerte huset med alt lyset. Og så er det masse sol her. Og god varme. Og det luktar godt av tømmer.

Men her er ikkje buande heilt enda. Innflytting vil bli i slutten av juni. Det som gjenstår er litt meir puss inne og puss ute. Tak og vegger skal malast. Golv summast. Dører skal i, og terrasse leggast. Bada står utan gips enn så lenge. Der skal komme boksar til dei innvendige armatura, og vi må ha inn innreiing. Litt gjenstår altså.

Men lyset har vi!

Bildet under viser kjøkenet. Høgskapa kjem i nisjen der det står ei skuffe – etter planen skal vi få dei lakkert grøne. Nedforinga for ventilatoren heng frå taket og ned. Var veldig i tvil korleis den skulle bli, men eg syns den fungerer bra!

Igjen – kjøkenet, her mot «yttervegg» som vender mot vinterhagen. Veggen er enda ikkje heilt tørr.

Og her i rommet innafor, som er ein bi-inngang og grovkjøken. Og ekstra vaskerom. Fine lyset!

To gamle stolar står berre å ventar på at ting skal bli ferdig, slik at vi kan flytte inn og nyte utsikta… Dei blir nok bytta ut med noko litt meir komfortabelt.

Igjen frå kjøkenet.

Vinterhagen har fått «øyenbryna» på. Det gjorde at denne siste «klossen» begynte å snakke meir saman med utspringet i front av huset (ikkje på bildet). Huset blei samanhengande. No gjenstår berre rekkverk på terrasse, og murpuss, så er utsida ferdig. Inne i vinterhagen står parketten stabla. Den kom i frå England i forrige veke.

No er vi på badet i underetasjen. Som sagt er veggane framleis opne. Det skal lagast boksar i veggen for armaturet. På ein stender har eg hengt ein lapp med skisse over korleis denne veggen skal bli med møblering. Ikkje alltid like lett å forklare til murar, elektriker og rørleggar kva som skal kor… Da er det like greit å lage ei arbeidstegning og få den på veggen. Vi har også tusja på golv og vegger for å vise møblering. Det er satt inn to vindu i veggen. Under kjem det to lampar, deretter spegel, to armatur to stikkontaktar og to vaskar.

Inn døra til vaskerommet / teknisk. Her kjem det vaskemaskin og tørketrommel med benkeplate oppå. Eg håpar berre kassen er høg nok til at vi kanskje kan få bygd kvitevarene litt opp. Kvitevarene er komne forresten – bestilt frå Danmark og stua inn i boder og skap her vi leiger. Platetoppen ligg under dobbeltsenga.

Resten av teknisk er ein imponerande spaghetti.

Og til sist frå tv-stova nede. Enn så lenge er mest heile trappeholet dekt av plater, men når dei er borte vil det komme lys ned her frå overlysvindua oppe. Eg trur vi vil sette pris på å få litt morgonlys ned hit!

Arbeidet går jevnt og trutt framover, og ingen problem har vore større enn at dei kunne løysast. No prøver vi så godt vi kan å halde tak i økonomien slik at vi ikkje får altfor mange tillegg på tampen. Tillegg blir det, men vi prøver å manøvrere oss bort frå det som gjer altfor vondt!

Bilderas

Som vanleg ikkje tid til å blogge – men arbeidet der oppe går jamt framover. Her er ein del bilde frå i går. Snart er all gips komme på plass- Hovedetasjen er så godt som ferdig. Veldig kjekt å sjå korleis lyset fell inn i huset – og gler meg til å få maling på veggane 🙂

Bildet under er tatt frå enden av gangen mellom bad og gjesterom oppe  og inn mot stove og kjøkken. Døra i enden av gangen er ut til vinterhagen.

Her er meir av kjøkenet. På veggen midt imot kjem kjøkkenhalvøya ut.

Her er frå inngangen. I kvar kortende av rommet blir det garderobeskap

Her er frå badet oppe. Vi ventar litt på avklaringar, pris etc, når det gjeld innebygd armatur og diverse. Kassen til venstre i bildet skal ha innebyggingsarmatur for vask og badekar (i hjørnet), og bli kledd med mosaikkflis. Over kassen blir det ein stor spegel frå vegg til vegg, med lampepunkt i spegelen. Resten av badet har vi faktisk kjøpt flis til allereie – heilt ordinære kvite, blanke fliser som er 30×60, til 45,- per kvm. Om lag same pris har vi gitt på heilt standard grå golvfliser i 30×30. Ingen skal påstå at flisene er påkosta i dette huset….

Grovinngang oppe. Vi lurte på om dette rommet ville bli mørkt, smalt og trangt, men vi er fornøgd med plassen mellom inngangsdør og kjøkkendør, og at takvinduet gir lys til heile rommet. Kjennes ikkje trangt ut i det heile tatt! Løysinga på vindu er den same her som førre bilde (badet).

Her frå kjøkkenet. Døra midt i bildet er til grovinngangen. Døra vi skimtar ved sida av er til hovedinngangen. Nisjen i venstre bildekant er for fire høgskap. I dag bygger dei ein kasse som skal ligger over skapa, og gå opp til nedre kant av veggen under overlysvindua. Røyret som heng ned i høgre bildekant el for ventilator som skal henge ned her over kjøkkenhalvøya. Det må byggast ein kasse for ventilatoren ned frå taket. I nisjen til høgre kjem benkeskap og overskap.

Same som over, men i annan vinkel. Mot veggen kjem det 6 benkeskap  med kjøkkenvask, oppvaskmaskin og kjeldesortering. Over benken, heilt vanlige overskap.

Underetasje. Dette er TV-stova. Det runde trappeholet blir fint! TV kjem på veggen midt i bildet, sofa vis a vis.

Håpar dette skal vere nok punkt for TV og alskens dippeduttar

Foreldresoverommet er blitt isolert, og har nok blitt gipsa i løpet av i dag.

Her er frå badet nede. Det fine lyset inn frå tv-stova og det store vinduet var for smertefullt å gje slepp på – særleg sidan rommet manglar dagslys. Så vi har bedt om å få inn to 25 cm. høge vindu heilt oppe mot nedforinga av taket. Det blir så høgt oppe på veggen at det ikkje er noko innsyn. Vi droppar dette i dusjsonen innerst i rommet (mot murveggen), men legg dei inn over vaskane. Også dette badet skal ha innebygd armatur. Baderomsinnreiing har blitt bestilt hos Kvik – dei hadde fine, firkanta heildekkande vaskar utan hol for kran. Flisene her nede blir dei same som flisene på bad oppe. Enkelt og greit.

Det har sin eigen estetikk dette også. Teknisk rom. Rørleggar fått på plass alt av sine røyr. Ventilasjon er lagt, og det er bora to digre hol i muren for luft inn og ut. I hjørnet skal dei etter kvart få løfta på plass eit monster av ventilasjonsaggregat (som ga meg hakeslepp). Ved sida av skal elektrikar få lov å få litt plass til  sine ting. At teknisk rom krev litt areal er ikkje tull. Berre rørleggergreiene har lagt beslag på ein heil  vegg aleine!

Ut ein tur. Det er støypt ein kant under vindua nede. Så skal vi få lagt elvestein langs med husveggen, deretter betongheller og plen.

Vi har bombesikkert fundament for terrassen. Eg trur folk mistenkte oss for å bygge helikopterplattform. Oppå her kjem det altså terrasse i komposittmateriale.

Og sånn ser det ut no.

 

Å sjå det for seg

Det krev litt å sjå ting for seg. Særleg når byggeplassen er dominert av blokker og stillas, grus og våt sand. Det hjelper med litt photoshopping!

Taket, som skal på om 14 dagar, blir spennande. Det er ein viktig del av huset sitt uttrykk mot vegen, og eg gler meg veldig til overlyset som vindua oppe vil gi i hovedetasjen. Her vil sola komme inn om morgonen.

Og litt frå kjøkenet. Gjennom den store opninga til høgre vil det vere utgang til vinterhagen. Bak veggen som er antyda med gult er grovkjøkenet. Det skal vere ei dør mellom grovkjøken og kjøken som ikkje er markert her. Grovkjøkenet vil absolutt vere eit smalt rom, men eg trur det blir funksjonelt likevel. Her kjem eit ekstra kjøleskap, utslagsvask, opplegg for vaskemaskin, og vil elles vere eit grovare rom til alskens greier. Rommet har også ytterdør. Kjøkkenøya i Picasso-stil, som ikkje er ei øy all den tid å ho står inn til ein vegg, er markert. Her skal kokesonen vere, og ventilatoren skapar hodebry som vi enno ikkje har løyst. Vi håpar det kan bli bra, sjøl om det er høgt opp. På andre sida av øya, mot bakveggen blir det også benkeskap. Her blir det også overskap. Ei rekke med fire høgskap er ikkje synleg – dei vil kome ut i rommet og delvis sperre for innsynet som dette utsnittet viser. Døra mellom benkeskapa går ut til vinterhagen, og vidare ut til terassen. Vindu i taket blir ikkje heilt slik – det blir fleire av dei. Var berre meg som ikkje tok meg tida å dele opp i fleire vindu…

Om nokon har tips om anna golv i matlagingssona, så kom med det! Er svært usikker på om det er klokt å legge parkett i denne delen av kjøkenet.

Trappeholet har vore under lupen. Rundt eller firkanta? Tanken var firkanta, men rundt høyres spennande ut. Det er heller ikkje kompliset å få til, men eit bua glas som rekkverk oppe høyres dyrt ut…. Da må vi kanskje gå for spiler likevel?

Jakta på omn held fram – denne snubla eg over på byggebolig-forumet. Er ikkje den flott? Produsent er Rais. Kanskje best av alt: mor mi insisterer på å finansiere herligheten. Og ho likte denne – og det er jo bra at giveren syns at varen ser bra ut?

Til sist: Det som har komme opp litt brått og uventa er at entrepenøren foreslår at vi får kjøpt inn jord til framsida av huset. Tingen er at dei snart skal i gang med muren ved sida av huset, som gjer at ein ikkje lenger vil kunne kjøre ned til framsida av huset. For å sleppe å kjøre 5 lass jord med trillebår er det LURT og SMART å ta det nå. Ja takk, sa vi, og minnar oss sjølv om å spare enda litt meir cash. Det begynner å bli ei lita liste over ting som kjem ekstra

Jord må vi ha! (Bilde lånt frå Norsk resirkulering as)

Sommar og stillstand

Det er midt i juli, og naturlig nok høyrer vi ingenting frå dei andre som skal gi anbud på huset. Sånn er det nå – folk må ha lov å ha ferie! I mellomtida tygg vi på det eine anbudet vi har fått, og håpar at kommande anbud vil vere litt lettare å svelge. Vi har i alle fall god tid til å tenke gjennom kor vi kan kutte kostnader. Eg tok ein telefon til tømrerfirma som leverte anbud på snekkerarbeidet. Dei gode nyhetene er at dersom vi droppar sink-tak og går for takpapp i staden, så halverer vi tak-budsjettet. Ja takk, seier vi da – så får sink vere så fint og flott det vil.

Elles kan vi utsette terrassen (kr. 80 000 trur eg det var?), og utsette garagen. Kanskje pyttelite leit? Å legge parkett sjølv skal vi greie – det har vi gjort før, men det spørs om det er så mykje pengar  å spare på dette. Og så var det energibrønnen da. Fine brønnen. Skal vi utsette den også, og satse på at lavenergihus nesten ikkje treng varme? Vi har jo vedomn oppe, og det går å skaffe seg ein laus olje- eller gassomn i underetasjen. Det kan nok bli kjølige badegolv dei første vintrane….

Men vi planlegg no vidare okke som, og håpar på mange gode anbud i august. I går var vi innom Gulvspesialisten for å sjå om kvitmattlakka ask og eik verkeleg var noko for oss. Viktig å sjå det i litt større format enn ein liten plankestump! Her fekk vi fin hjelp og ein del nyttig info. Kvitmattlakka eik var det som fall mest i smak (finare mønster enn ask), og jammen meg likte eg ikkje best kina-parketten som var billigast. Hmm… Selgaren bedyra at den var laga for det nordiske markedet (med tanke på tørking av treverket), og at kvaliteten var god. Den andre eikeparketten som også var kvitmattlakka og einstavs, var litt dyrare, men denne var litt meir solid, hadde eit litt betre klikksystem, og ei stripe med voks i klikk’en som forhindra knirk. Viktige ting med andre ord. Men mønsteret og gløden i denne var ikkje like fint som i billig-parketten. Heldigvis skal vi ikkje bestemme oss enda.

Elles har eg tenkt å ringe Enova (mulig dei har ferie også?), og høyre nærmare om dette med lavenergihus og krav til vindu. I anbudet vi har fått er prisen på vindu satt til 500 000,- . Ihhh! Trelags superisolerande glas er tydeligvis veldig dyrt. Eg må sjekke om et er mulig å ha mindre isolerande glas enkelte stader, f.eks på dei minste vindua. Dernest trur eg vi må sjølv ta kontakt med diverse vindusfirma og be om pris. Kanskje kan vi spare ein del på å kjøpe vindu sjølv og halde dette utanfor anbudet. Det blir derfor ein telefon til Lyssand, Natre og Gilje. Fleire finst der vel også.

Elles har mine foreldre proklamert at dei skal betale kjøkkenventilator. Ja takk seier vi da 🙂 Enn så lenge har vi våre auge på Cilindro i kvit frå Rørosmetall. Sidan denne saken skal henge fritt i rommet, og ha eit laaangt røyr opp i eit himmelhøgt tak, føler eg for å finne ein ventilator som er litt «underdanig». Blank kvit trur eg blir bra mot kvit høgglans kjøkken. Og vi skal ha glashette – trur vi kan trenge all hjelp som er å få når lukt og os skal trekkast frå eit så digert kjøkken.

Bildet under er frå Norema og viser den kvite varianten, utan glasplate.

Og her er ventilatoren i stål, med glasplate

Over og ut frå meg! Vi nyt sommaren og håpar på gode anbud i august!

Første tilbud

Det kom ein tjukk konvolutt i postkassen i dag. Det var tilbud frå ein av murarane. Det er eit ryddig og bra tilbud – men vi må ned i pris. Eg lurer litt på om vi kan hente noko på tømrararbeidet. Det blir svært spennande å få fleire tilbud inn og samanlikne prisane. Det vil nok variere kor detaljerte tilboda er – og det er synd for det er nyttig å kunne samanlikne dei ulike kategoriane. Vi ser at berre vindua i huset, i dette tilfellet frå Nordan, ligg på nesten 500 000! Sånn går det når ein abslutt skal ha vinterhage…   Enn så lenge ser eg ikkje så mørkt på det. Eg har tru på at vi kan komme ned i ein pris som er leveleg for oss. Evig optimist.

Fasadane er blitt etterspurt. Her kjem dei.

Mens vi venter….

Det er i tjømda, som mor mi ville ha uttrykt det. Det kjem, og vi kan merke at det kjem snart. Anbuda på huset altså. Det ringer stadig vekk ein rørleggar hist og ein elektrikar pist; folk som gir sine tilbod til ulike murarfirma som vi har kontakta. Dei fem ulike murarane vi sendt papira til vil sy saman ein totalpakke. Ein av murarane har allereie ringd og gitt beskjed om at han sit med dei siste papira – det kjem, det kjem.

Om to veker har vi ferie begge oss vaksne i familien. Ungane drar på ferie med familie, så vi blir igjen aleine med ti dagar til å blafre i papir og vege for og imot. Vi har nok papir allereie syns vi – men meir skal det bli.

Det er stille før stormen…

Siste utvikling

Eg skal ikkje skryte på meg å vere aktiv på blog-fronten nei. Der har vore ein del folk som har etterspurt oppdatering, så då var det på tide. Det er ikkje det at ingenting har skjedd! Anbudsdokumenta er nå ferdige, og vi er svært glad for den innsatsen arkitekt Teresa Fersum har gjort for oss. Oppi alt dette har ho også greid å sette ein ny verdensborgar til verda – det står det respekt av! Vi er svært fornøgde med å ha brukt arkitekt, og syns det var fantastisk å få eit hus teikna etter våre preferansar og behov. Vi føler absolutt at det er i denne fasen av «husbygginga» at huset har blitt skapt – det som gjenstår nå er «berre» å få ideen hus til å materialisere seg til objektet hus! 😀

Nå i juni sette vi i gang anbudsprossen, og no ventar vi spent på tilbakesvar. Vi har kontakta både lokale heltar (med godt omdømme), og større entrepenørar som har gjort dette mange gonger før. Dei fleste har eg snakka med personlig – noko eg fann svært nyttig. Eg har god tru på at ein skal følge magekjensla litt når ein er i ein slik prosess. I tillegg er ryddige anbud, gode referansar og pris viktig, men pris betyr heller ikkje alt. Kven vi ender opp med veit vi enda ikkje, men valget vil bli gjort i løpet av sommaren, og i samråd med arkitekten.

Vi er også spent på kor mange nullar det blir i sluttsummen. Det er vel den mest frustrerande biten med å bygge eit spesialteikna hus – det å ikkje vite sluttsummen heilt sikkert.

Eg legg ut dei siste, og endelege, teikningane, som viser planløysinga. Vi gler oss til det store kjøkenet – til vinterhagen – til dei store vindusflatene nede – utgang frå soverom – og alt lyset som vi trur vi vil få.